> ரஜினி மகள் திரைப்படத்தை வெளியிட தடை

நடிகர் ரஜினிகாந்தின் மகள் சௌந்தர்யா தயாரிக்கும் "கோவா' திரைப்படத்தை வெளியிடுவதற்கு உயர் நீதிமன்றம் தடை விதித்துள்ளது.

ரஜினிகாந்தின் மகள் சௌந்தர்யா "ஆக்கர் ஸ்டுடியோஸ்' என்ற படத் தயாரிப்பு நிறுவனத்தை நடத்தி வருகிறார்.

"சென்னை 600 028', "சரோஜா' ஆகியப் படங்களை இயக்கிய வெங்கட் பிரபுவின் இயக்கத்தில் "கோவா' என்ற படத்தை சௌந்தர்யா தயாரித்து வருகிறார். இந்தத் திரைப்படம் தொடர்பாக வருண் மணியன் என்பவர் தாக்கல் செய்த மனு விவரம்:

"என்ஏபிசி பிராப்பர்டீஸ் லிமிடெட்' என்ற நிறுவனத்தின் நிர்வாக இயக்குநராக உள்ளேன். எங்கள் நிறுவனம் கட்டுமானப் பணிகள் உள்ளிட்ட பல்வேறு தொழில்களில் ஈடுபட்டு வருகிறது. "கோவா' திரைப்படத்தைத் தயாரிக்க நிதியுதவி கோரி "ஆக்கர் ஸ்டுடியோஸ்' நிர்வாகிகள் என்னை அணுகினர். நாங்கள் வழங்கும் தொகைக்கு ஆண்டுக்கு 24 சதவீத வட்டி அளிப்பதாகவும் உறுதி அளித்தனர். இதையடுத்து, ரூ.1.1 கோடி கடன் வழங்கப்பட்டது.

இதற்கு கடன் உறுதிப் பத்திரங்களும் பெறப்பட்டுள்ளது. அதேபோல், எனது சொந்தக் கணக்கில் ரூ. 50 லட்சம் வழங்கியுள்ளேன். ஆனால், இந்தப் பணத்தையோ, வட்டியையோ இதுவரை "ஆக்கர் ஸ்டுடியோஸ்' திருப்பி அளிக்கவில்லை.

"கோவா' திரைப்படம் முடிவதற்கு முன்பு பணத்தை திருப்பி அளிப்பதாக அவர்கள் உறுதியளித்தனர். தற்போது, அந்தப் படத்தின் படப்பிடிப்பு முடிந்த நிலையில், படம் விரைவில் ரிலீஸôக உள்ளது. நாங்கள் வழங்கியப் பணத்துக்கு வட்டியுடன் ரூ. 2 கோடி அளிக்க வேண்டும். கடனை திருப்பிச் செலுத்தாமல், படத்தை வெளியிடுவதற்குத் தடை விதிக்க வேண்டும் என்று மனுவில் கோரப்பட்டது.

இந்த மனு நீதிபதி ஜி.ராஜசூர்யா முன்னிலையில் விசாரணைக்கு வந்தது.

மனுவை விசாரித்த நீதிபதி, டிசம்பர் 11}ம் தேதி வரை "கோவா' படத்தை ரிலீஸ் செய்ய தடை விதித்தார். இதுதொடர்பாக, பதிலளிக்குமாறு சௌந்தர்யாவுக்கு நோட்டீஸ் அனுப்பவும் நீதிபதி உத்தரவிட்டார்.